Бичлэг тандагчТаван ургамал тутмын нэг нь устах аюултай байна
2011-05-21,20:12
Таван ургамал тутмын нэг нь устах аюултай байна Дэлхий дээрх амьдралын эх булаг болсон ургамлын тавны нэг нь устах аюулд ороод байгааг судалгаа харуулж байна.
Судлаачид 4,000 орчим зүйлийн ургамлыг сонгон судалж үзээд, үүний 22% нь устах аюулд ороод байгааг нотолсон байна. Судалгааг Английн Байгалийн түүхийн музей болон Байгаль хамгаалах олон улсын нийгэмлэг явуулжээ.
Ойролцоогоор 380,000 орчим зүйлийн ургамал байдаг нь тогтоогдсон бөгөөд газар тариаланд зориулж ой модыг устгаснаас маш олон төрлийн ургамал устах аюулд оржээ. Ялангуяа халуун орны ойн ургамлын төрөл зүйлүүд устах аюулд хамгийн ихээр өртөөд байгаа юм. Энэ удаагийн судалгааны онцлог нь ургамлын үндсэн таван төрөл зүйлээс дээж авч судалсан учраас үр дүн нь илүү бодитой болсон гэнэ.
Судалгааны ажлыг эхлүүлсэн профессор Стифен Хоппер хэлэхдээ судалгааны дүнгээс ирээдүйд ургамал хэрхэн устаж болох талаарх үндсэн мэдээллийг авч болно гэжээ. Мөн тэрээр "Ургамал бол эх дэлхийн амьдралыг тэтгэгч, цэвэр агаар, хоол хүнс, түлшний эх үүсвэр, тиймээс бид устахыг нь хараад гар хумхин сууж болохгүй, бид амьсгалах бүрт ургамлын оролцоо хэрэгтэй байдгийг мэдэх хэрэгтэй" гэсэн юм.
Ургамал судлаачдыг түгшээж байгаа бас нэгэн асуудал нь зарим ургамлыг судалж амжаагүй байхад устаж үгүй болж байгаа явдал юм. Ургамлаас гаргаж авсан эм, эмийн бүтээгдэхүүн нь буурай хөгжилтэй орнуудад эмчилгээний ганц хэрэглэгдэхүүн нь болдог. Мөн судалгаагаар дэлхий даяар зарцуулагдаж буй калорийн 80%-г ердөө 12 төрлийн ургамлаас гарган авдаг гэнэ. Иймээс бид бүхэн байгаль дэлхийгээ хайрлан хамгаалах нь юу юунаас чухал байна
